ANPA "Pardo Bazán" CEIP Froebel

Libros curso 2010-2011

Pepe — 2010-08-16T11:46:56Z

Ola,

comunicarvos que desde o día 1 de setembro de 2010 entregaranse no colexio os vales para a adquisición dos libros do vindeiro curso escolar. Podedes encargar os libros antes e decirlle os libreiros que os garden ata que lles levedes o citado vale.

Os de terceiro e cuarto curso de Primaria non merquedes ningún libro, xa que para estes dous cursos son de préstamo e repartiranllos ós nenos cando comencen as clases.

Saúdos.

Comedor e Madruga

Pepe — 2010-08-16T11:40:52Z

Ola a todos,

adxuntamos un arquivo en pdf donde podereves ver a información sobre os servizos de Comedor e Plan Madruga para o curso que vai comezar.

Saúdos.

LIBROS DE TEXTO 2009/2010

Pepe — 2009-08-17T09:29:02Z

O prazo para a presentación da solicitude estará aberto do 1 ao 30 de setembro.

O Consello da Xunta aprobou a convocatoria de bolsas para a adquisición de libros de texto no curso 2009-2010, no que comezará a implantarse o novo modelo de gratuidade solidaria. Este programa, que dotará ás familias de bolsas en función da súa renda, substituirá progresivamente ao de préstamo vixente, comezando polos cursos de 1º, 2º, 5º e 6º de Primaria e Educación Especial.

Estas bolsas, dotadas cunha cuantía total de 6,9 millóns de euros, serán outorgadas en función do nivel adquisitivo de cada familia. Todas os fogares con ingresos inferiores aos 9.000 euros per cápita recibirán unha axuda de 104 euros por cada neno. Se ademais os ingresos son inferiores a 5.400 euros per cápita ¿ou 6.000 no caso de familias monoparentais- a bolsa increméntase ata os 180 euros. Para os alumnos de Educación Especial, a Consellería de Educación garante 250 euros, sexa cal sexa o nivel de renda.

A convocatoria terá en conta o exercicio fiscal do ano 2008 e presenta unha atención especial ás familias con membros afectados por minusvalías igual ou superior ao 33%, xa que estas persoas computarán por dúas á hora de establecer o nivel de renda.

O sistema de gratuidade solidaria comezará a implantarse en 1º, 2º, 5º e 6º de Primaria e Educación Especial debido a que hai que repoñer os manuais destes cursos o vindeiro ano. No resto dos niveis substituírase progresivamente o de préstamo ata quedar completamente implantado a partir do 2012-13.

As solicitudes poderanse recoller nos centros, nas delegacións territoriais ou na páxina web www.edu.xunta.ese o prazo para a súa presentación será do 1 ao 30 de setembro. Así mesmo, estas solicitudes terán que presentarse nas secretarías dos centros educativos, que deberán proporcionar asesoramento ás familias que o requiran.

Unha vez tramitadas e resoltas as axudas, os listados definitivos de admitidos publicaranse nos taboleiros dos centros, no portal educativo da Consellería e nos departamentos. O pago farase a través dos centros que terán 10 días para o aboamento aos beneficiarios.

A axuda será compatibles con outras destinadas ao mesmo fin sempre que non se supere o custo dos libros e materiais subvencionados e deberá destinarse integramente a súa adquisición.

Fonte: Consellería de Educación

Subvención dos libros

ANPA — 2009-06-29T15:31:28Z

A Consellería de Educación e Ordenación Universitaria aportará 180 € por alumno de familias con rendas baixas grazas ao novo sistema de axudas á compra de libros en centros públicos e concertados, que vai sustituír progresivamente ao mecanismo de préstamo vixente. O novo programa dotará as familias de bolsas que cubrirán a compra en función do nivel da renda, asegurando axudas para as familias con menos recursos. O sistema de "gratuidade solidaria", concibido para que as rendas máis altas e desafogadas contribúan solidariamente coas máis necesitadas, é o que máis cartos aporta por alumno en toda España.

A bolsa cubrirá a totalidade do gasto en libros para familias con ingresos de ata 5.400 euros anuais por persoa no fogar ¿ou ata 6.000 €, se a familia é monoparental- cunha axuda máxima de 180 euros por cada neno. Para as familias con ingresos entre 5.400 e 9.000 euros por persoa no fogar ¿ou entre 6.000 e 9.000 € no caso das monoparentais-, a Consellería garante unha axuda aproximadamente a metade do custo. Ademais, a bolsa será de ata 250 euros para o alumnado de Educación Especial, independentemente dos ingresos familiares.

Con este sistema, Galicia sitúase á vangarda do resto de autonomías en axudas para os libros escolares, colocándose por diante de Navarra -133 euros como importe máximo-, Comunidad Valenciana -127 euros- ou Castilla y León -105 euros. Compre sinalar que cos 180 € pódense mercar todos os libros na maioría das librerías de Galicia. Polo demáis, o sistema en base á renda xa está implantado noutras comunidades como Asturias ou Extremadura, que contan con gobernos socialistas.

A modalidade elixida permite unha maior solidariedade, centrando as axudas nas familias con menos recursos ao contrario que o anterior modelo que outorgaba cobertura universal, fose cal fose o nivel de renda. Tamén devolverá a estabilidade ao sector do libro, afectado profundamente polo sistema de préstamo e que vía como os seus ingresos variaban cada ano en función dos cursos que se tiñan que renovar.

Implantación progresiva O sistema de axuda á compra de libros comezará nos dous próximos cursos para 1º, 2º 5º e 6º de Primaria e Educación Especial. No curso 2011-12 sumaranse 1º e 3º da ESO, para pasar a cubrir todos os niveis a partir do curso 2012-13. Os libros de 1º, 2º e Educación Especial xa se renovaban todos os anos e este curso tocaba cambiar os de 5º e 6º.

O programa actual de préstamo continuará vixente mentres dure a implantación do novo sistema, polo que os alumnos de 3º e 4º de Primaria e os de Secundaria recibirán os lotes correspondentes no mes de setembro.

A convocatoria para estas axudas publicaranse no Diario Oficial de Galicia durante o verán e as familias poderán solicitalas nos centros a partir do mes de setembro.

MEMORIA DE ACTUACIÓNS DA ANPA. CURSO 2008-2009

ANPA — 2009-06-29T15:12:28Z

 Entrevistouse con distintas empresas, elixiu a Gaia para a xestión das actividades extraescolares e velou polo bo desenvolvemento das actividades extraescolares.

 Subvencionou ás familias que son socias:

o En 4.º, 5.º e 6.º de infantil, o autobús na saída a Apípolis.

o En 2.º de primaria, a saída ao Salón do Libro.

o En 5.º de primaria, a saída ao Grove.

o En 6.º de primaria, a viaxe a Italia.

 Colaborou na recollida de alimentos na campaña de Nadal.

 Promoveu a I Olimpíada lúdico-cultural e pagou os tres cabaletes de infantil pola súa colaboración. Os premios de primaria púxoos a Concellaría de Normalización Lingüística.

 Distribuíu gratis ás familias que son socias os DVD dos festivais de Nadal e das Letras Galegas.

 Promoveu e aboou as mamparas do comedor.

 Comprou colchonetas para que descansen os nenos e nenas que o precisen na hora do comedor.

 Demandou ante a Xefatura Territorial de Educación o mantemento da praza de AL e a dedicación non-compartida da orientadora.

 Actualizou a páxina web da ANPA como instrumento de comunicación da nosa comunidade educativa.

 Xestionou o chándal do colexio para as familias socias e non-socias.

 Velou polo bo desenvolvemento do comedor e Madruga.

 Colaborou coa biblioteca.

 Constituíu e preparou o grupo de teatro do colexio que estreou a obra Picadura mortal no Festival das Letras Galegas.

Grazas pola vosa participación e colaboración porque todos axudamos a mellorar!

Circular de CONFAPA

ANPA — 2009-06-16T13:32:21Z

Estimados compañeiros e compañeiras:

O galego é a lingua propia de Galicia. Tódolos galegos teñen a obriga de coñecela e o dereito de usala. E dicir, teñen o dereito non a obriga.

Hai que determinar na Ensinanza Primaria e Secundaria unhas materias que se deben impartir en galego e garantir que todo o alumnado adquira unha boa competencia nas dúas linguas oficiais establecendo o equilibrio necesario. Neste senso, non se debe esquecer que os centros deberán elaborar un proxecto lingüistico no que se terá en conta os criterios e as medidas necesarias para o cumprimento dos obxectivos previstos. Este proxecto lingüístico do Centro será aprobado e avaliado polo Consello Escolar.

Dende as aulas non se pode contribuír a desigualdade social entre as linguas, senón que se debe posibilita-lo seu uso normal en calquera contexto e situación. E iso ten vixencia para ámbalas dúas linguas oficiais.

Non quixeramos nós, baixo ningún concepto, contribuír a impedir o desenvolvemento dun dos trazos mais significativos dos galegos. A mellor maneira que temos de contribuír á creación dun mundo mellor, é a partir do propio, para compartilo.

Temos a obriga de non renunciar ao noso idioma, a tódolos idiomas; sobre todo cando, identidades á marxe, estando presente no currículo, como materia de estudo e ampliando os seus ámbitos de uso, de todos eles, chegaremos á verdadeira competencia lingüística (entender, falar, ler, escribir).

O que debemos ter presente é que debemos planificar lingüisticamente con seriedade, rigor, competencia profesional e sen complexos.

Tódalas linguas son necesarias, por iso non renunciamos ao galego.

Unha das primeiras medidas que tomou a actual Consellería de Educación da Xunta de Galicia é sondar os pais e nais sobre o uso das linguas na ensinanza non universitaria de Galicia, o que se resume no eterno debate entre o uso do galego ou non. O primeiro problema ou erro que cuestionamos é o rigor científico desta enquisa, ademais de considerar que a Consellería de Educación debe preocuparse doutras moitas cuestións que consideramos de maior relevancia.

CONFAPA-GALICIA sabe que a escola pública ten outras moitas prioridades que mellorar, como por exemplo: pavillóns deportivos, patios cubertos, profesores de apoio, profesores para nenos con necesidades educativas especiais, coidadores na etapa 3-5 anos, coidador/recepcionista de centro dos alumnos transportados, prazas nos comedores escolares, plan de actividades extraescolares, e un longo etcétera.

Dende a Confederación Galega de APAS recomendámosvos que lles indiquedes aos vosos asociados e tamén aos pais e nais dos Centro, que sería moi importante para a escola, que no apartado de “Comentario ou suxestión que desexe facer” da enquisa, se fixese constar os problemas ou cuestións mellorables no Centro.

Saúdos.

A Coruña, 8 de xuño de 2009

CARTA-PRESENTACIÓN DO TRÍPTICO INFORMATIVO DA CGENDL

ANPA — 2009-06-10T21:08:51Z

Os membros da CGENDL, docentes que traballamos nos colexios e institutos no día a día e que, polo tanto, coñecemos a realidade dos centros e a súa situación lingüística, vemos con moita preocupación o problema xerado nos últimos tempos arredor da presenza das linguas no ensino, que derivou nunha confrontación aberta arredor dun ben común que nos tiña que unir, a lingua galega.

Consideramos que a convivencia do galego e o castelán non ten que ser un problema senón unha vantaxe, unha oportunidade para a nosa sociedade. Algo que todos os estudos, e que o sentido común da inmensa maioría da poboación galega avala, vén sendo perigosamente interpretado dende determinados sectores políticos. E máis perigoso é que se trasladen ós centros de ensino problemas que non atenden a razóns pedagóxicas, abocándonos cara a un escenario de lamentable confrontación social.

Ademais pensamos que dende unha perspectiva pedagóxica todos os implicados no ensino deberiamos centrarnos en conseguir que os nenos e nenas sexan igualmente competentes en galego e castelán. Polo tanto, o debate que se ten que abrir é precisamente este: que medidas temos que adoptar para conseguir que os rapaces e rapazas dominen plenamente as dúas linguas, tal e como establece a LOE.

Neste contexto elaboramos un tríptico destinado ás familias que é o que hoxe presentamos, e que se vai distribuír na medida das nosas limitadísimas posibilidades. Por que este tríptico? porque parece que hai que volver recordar que o galego é a lingua propia de Galicia; que nos pertence a todos e todas e non podemos xogar co seu futuro, porque intereses políticos, que non educativos, veñen de crear un problema no ensino arredor das dúas linguas oficiais que pode derivar nunha perigosa fractura social, polo tanto COMO DOCENTES pensamos que debemos ofrecer información rigorosa sobre a aprendizaxe de linguas baseada en estudos científicos que se fixeron tanto dentro coma fóra da nosa comunidade.

E dito isto, queremos insistir en:

a. é unha sorte, non é unha desgraza, que a nosa comunidade conte cunha lingua milenaria, que nos debe unir. Polo tanto non se debe permitir que triunfe a idea de que o galego é un obstáculo para os estudantes, mantendo vellos prexuízos que no século XXI deberían estar plenamente superados, pero que pretenden manter relegada a lingua galega nun lugar secundario na sociedade.

b. se é evidente que para mellorar a competencia en lingua inglesa é necesario que se impartan en inglés determinadas materias, a sociedade galega debe asumir tamén o mesmo para a lingua galega, é dicir, que para saber galego é necesario “aprender en galego”.

c. o galego segue a ser unha lingua minorizada na nosa comunidade e polo tanto necesita unha discriminación positiva tanto dentro coma fóra do ensino.

Estes parécennos motivos suficientes e razoables para difundir este tríptico entre as familias e a sociedade galega en xeral. Polo tanto, está á disposición de todos aqueles ENDL, ANPAS, direccións de centros ou calquera persoa da comunidade educativa ou relacionada co mundo do ensino, e mesmo da sociedade en xeral, que queira difundilo.

BREVE VALORACIÓN DA ENQUISA DA CONSELLERÍA DE EDUCACIÓN

A enquisa que a Consellería de Educación e Ordenación Universitaria pensa distribuír esta mesma semana entre as familias a través dos centros educativos é pouco rigorosa e mostra un grande descoñecemento tanto da sociolingüística coma do mundo do ensino, o que nos parece aínda máis grave. Por poñer un exemplo, non existen materias troncais no ensino non universitario, esta é unha terminoloxía do ensino universitario. Polo tanto, o señor Conselleiro debería saber que o que hai son materiais obrigatorias e optativas, propias de modalidade ou non. É así que non vén a conto empregar o termo “troncais” porque non hai unhas materias máis importantes ca outras, todas teñen unha misión educativa global.

Centrándonos na cuestión da análise sociolingüística, nunha breve análise podemos observar:

1. En qué documento, lexislación, tratado, artigo ou normativa aparece recollido o dereito a escolleren os pais a lingua da docencia dos fillos? Porque si existen moitos outros dereitos que as persoas, na maior parte dos casos, non poden exercer, por exemplo o dereito a seren atendidas en galego na Xunta de Galicia cando o soliciten.

2. Estase preguntando sobre un dereito, “o dereito de coñecer o galego”, fallando na metodoloxía, porque tal e como están presentadas as preguntas non fai falta ser moi experto para darse conta de que o que se extraia de aí non pode valer para moito e menos para facer un novo decreto. Porque? Nas opcións de resposta vemos:

· “todo en galego” que non se refire a todo o ensino en galego, senón a tódalas materias, que na enquisa se denomina troncais, en galego.

· “a maioría en galego” (que é a maioría?: o 52% ou o 95%?),

· “unhas en galego e outras en castelán”, a xente pode pensar que esta é a mellor resposta porque indicaría o 50% e iso non é certo. Se queremos que o 50% do ensino estea en galego hai que contestar “todas en galego” que é o que marca o actual decreto.

3. Tampouco é fiable xa que non presenta as mínimas garantías de calquera consulta para que os resultados sexan cribles. O universo da investigación parece que vai ser todo, pero, como o van garantir?

· A cantos pais lles vai chegar? Nestas alturas de curso, como van facer para que o alumnado entregue na casa a enquisa e a traia de volta no prazo duns días. Ademais, como van asegurar que a enquisa a van contestar os pais que deban facelo?

· Cantos pais van contestar? Os concienciados dunha ou doutra banda, pero vai ser fiable se só contesta un 10% e esa porcentaxe está nutrida maioritariamente por pais das urbes, por exemplo. para ter algunha fiabilidade debería haber unha mostra estratificada que cubra a diversidade sociolingüística da sociedade.

· Déixase a distribución e recolla en mans de direccións que no final de curso están sobrecargadas de traballo.

· Pregúntase aos pais con fillos escolarizados en xuño de 2009 mais non aos que van entrar no sistema en setembro. Contestan os pais que tiveron fillos neste curso que vai rematar dos que parte non van estar escolarizados no vindeiro curso? Por que non se lles pregunta aos pais que van escolarizar rapaces para o vindeiro curso?

4. Pretenden facer un referendum? Para iso habería que facer outras preguntas e formulalas de modo diferente. O que se cadra era interesante preguntar era se os pais consideraban importante que os seus fillos/as ao rematar o ensino obrigatorio fosen competentes nas dúas linguas oficiais en Galicia, con dúas opcións de resposta: Si ou Non.

5. Non houbo unha campaña de información rigorosa previa. Non se deu. Prevalece a propaganda mediática que tivo e ten intencións políticas máis ca educativas. Non se lles pode mandar ós pais que contesten unha enquisa con tantas “eivas” nun momento de “marexada” informativa, cando ademais falamos dunha poboación que está chea de prexuízos cara ó galego derivados en moitos casos da represión lingüística que sufriu o galego ata os anos 80.

Para rematar: fará a Consellaría máis enquisas sobre temas fundamentais como a ratio de alumnos/as por grupo, a necesidade de persoal de apoio nas aulas ou pola seguridade nos autobuses? E se pregunta sobre o gasto en biblioteca por centro ou o financiamento dos comedores escolares?

I Olimpíada Lúdico-cultural

ANPA — 2009-06-10T20:56:44Z

A ANPA promoveu tamén a I Olimpíada Lúdico-Cultural coa colaboración da Concellaría de Normalización Lingüística, do Departamento de Orientación e do persoal docente e non-docente.

Na olimpíada participaron 15 grupos de 4 alumnos/as cada un (Churros, Super Artistas, Pura Sangre, Os Raios, NAD, Os Stilton, LLice, Lagon Ford, Ghost Kids, Crazy Weekend, Camp Rock, Calavera, Baju, As Espías e Abadaz) e o alumnado de infantil. En total participaron sobre 130 alumnos e alumnas.

Os grupos gañadores foron Llice, que recibiu 4 vales de 40 euros e un lote de 16 libros; e As Espías que recibiu 4 vales de 25 euros e un lote tamén de 16 libros. Por outra banda os grupos que superaron os 40 puntos (Abadaz, Os Stilton, NAD e Churros) recibiron cadanseu lote de 16 libros.

Os grupos durante 10 semanas tiñan que resolver diversas modalidades (Razoamos, Adiviñamos, Usamos a lóxica e Investigamos) e xuntar o máximo número de puntos por semana.

Coa olimpíada tratábase de fomentar o traballo en equipo e a convivencia, inducir á investigación, dinamizar o uso da biblioteca e das novas tecnoloxías e fomentar o razoamento e o pensamento lóxico entre outros obxectivos.

Grupo de teatro

ANPA — 2009-06-10T20:54:49Z

Este curso en colaboración coa ANPA constituíuse A Fraga, grupo de teatro do colexio, formado por Eduardo, Julia, Elisa, Patricia, Francisco, e Andrea. Tamén colaboraron Maikel e Pedro. Na elaboración do decorado da obra participaron os alumnos e alumnas de 6.º e 5.º curso.

O grupo estivo preparando todos os luns a obra de teatro, inédita e de humor, Picadura mortal. Representouse por primeira vez no Festival das Letras Galegas o pasado 2 de xuño ante toda a comunidade escolar.

Sinopse:

Unha directora de cine dirixe varias tomas nas que uns pésimos actores van repetindo unha mesma escena dende distintas perspectivas (máis rápido, con máis choros, con máis harmonía e con máis gracia).

Mesturanzas

ANPA — 2009-04-29T11:54:03Z

Dende a Federación Provincial de ANPA de Pontevedra (FANPA-PONTEVEDRA), e en colaboración coa Concellaría de Educación do Concello de Pontevedra poñémonos en contacto con vós para informarvos da posta en marcha da SEGUNDA EDICIÓN DO PROGRAMA DE LECER E TEMPO LIBRE MESTURANZAS dirixido a familias dos colexios públicos de Pontevedra.

Con este Programa pretendemos dar unha alternativa de ocupación activa do lecer, favorecendo a participación conxunta de nais/pais e fillos/as en actividades nas que podedes compartir experiencias, diversión e aprendizaxe.

PROGRAMA DE ACTIVIDADES:

· Obradoiro de Cociña saudable para pais /nais

Sábados: 25 abril - 9, 16, 23, 30 maio - 6, 13, 20 xuño - Horario: 10:30 a 12:00 h

No comedor do CEP Xunqueira 2

· Obradoiro de cociña creativa para nenos/as

Sábados: 25 abril - 9, 16, 23, 30 maio - 6, 13, 20 xuño

Grupo 1: 4 a 7 anos - Grupo 2: 8 a 13 anos - Horario: 10:30 a 12:00 h

No comedor do CEP Xunqueira 2

· Patinaxe en familia

Grupo venres: 24 abril - 8, 15,22,29 maio - 5,12,19 xuño-Horario: 17:00 a 18:30 h nas Pistas deportivas do CEIP Campolongo

Grupo sábado: 25 abril - 9,16, 23, 30 maio - 6,13,19 xuño - Horario: 17:00 a 18:30 h nas Pistas deportivas do CEIP Campolongo

· Xadrez en familia

Sábados: 25 abril - 9, 16, 23, 30 maio - 6, 13, 20 xuño - Horario: 11:00 a 12:30 h

No CEIP Froebel, rúa Afonso XIII

· Sendeirismo e Tempo Libre en familia

Sábados: 25 abril - 9, 16, 23, 30 maio - 6, 13, 20 xuño - Horario: 10:00 a 13:00 h

Punto de encontro: Local FANPA, rúa Afonso XIII, nº 7

· Artes plásticas para nenos/as

Venres: 24 abril - 8, 15, 22, 29 maio - 5, 12, 19 xuño

Grupo 1: 4 a 7 anos - Grupo 2: 8 a 13 anos - Horario: 17:00 a 18:30 h

No aula de artes plásticas do CEIP Campolongo